Nanook Roskilde Festivalimi tusarnaartitsereerlutik: Puigunngisaannassavarput
Nanookikkut Roskilde Festivalimi tupersuarmi Pavillionimi sisamanngornermi tusarnaartitsineranni tusarnaariat tusindilippassuit nuannaarsuataarrapput. Nanookimi pilersitseqataasup, erinarsortup, guitarertullu Christian Elsnerip ippassaq tusarnaartitsinertik qiimmatsaatigeqaa.
- Maaniinnerput nuanneqaaq, naammassitikkusunngikkaluarparput. Minutsit 80-it ingerlapallattorujussuupput. Taamaammat pisinnaasaq tamaat nuannisarpugut. Tusarnaartugut tusarnaartitsinermut puigunngisaannagassatsinnut qutsavigisinnaavagut. Tamaat ataatsimut isigalugu misigisaq nuannersorujussuuvoq, Christian Elsner oqarpoq.
Tusarnaartitsinissap aallartinngilaarnerani Nanookimi nipilersortartut tallimat misigissutsimikkut attortisimavissorput, taakkumi Roskilde Festivalimi tusarnaartitsinissaq ukiunit qulinit amerlanerusuni takorluugaraat. Tusarnaartitsinnginnerminni ileqquat tassa ataatsimut eqitaarneq Danmarkimi festivaalit annersaanni tusarnaartitsinissaanni isumaqarnerungaatsiarpoq.
- Sumé, 1995
- Angu, 2005
- Nive and the Deer Children, 2011
- Small Time Giants, 2012
- Nanook, 2019
- Ukiorpassuarni sinnattorinikuusatta piviusunngoriasaarnera pissanganaqaaq. Scenep tunuani aallaamasorujuulluta piareersimalluta scenemut iseratta inuppassuarnik ulikkaarami pikkunartorujussuuvoq.
Tusarnaartitsinerminni nutaanik qangarnisanillu atugaqarput. Nipilersoqatigiit atortakkaminnit rockernerusunik festivaalimi atuinissartik aalajangersimavaat. Tusarnaarianit nuannarineqarluartut malugineqarsinnaasoq, Christian Elsnerip oqaatigaa.
- Tupermiittummi tamarmik nukissamik ulikkaavillutit atuereernitta kingornani ersaattaattarput.
- Tusarnaartitsinermi taanna pikkunarnerpaasoraara. Kikkut tamarmik takusarluta takkupput. Taavalu uninngaannarlutik sikimisaarlutik pattaateqataapput, taava kikkut tamarmik tassanngaannaq aallaamaleriasaarput. Nuanningaatsiarpoq takuneqarsinnaavormi nipilersukkat nuannarilluaraat.
Christian Elsnerip tusarnaartitsinertik nittartakkatigut attaveqaqatigiittarfinni tusarnaartitsereernermilu nuannersumik utertitsiffiulluarnerarpaa.
- Europamit Danmarkimiillu inuppassuit ornippaatigut, taakkulu Kalaallit Nunaanneerluta taama nipilersorsinnaanerput tupigusuutigerrappaat. Tamanna Danmarkip uaugutsinnut nunatsinnittunut qanoq ilisimasakitsigineranik takussutsitsiinnarpoq, Nunatsinnimi kisiartaalluta nutaalianik taama nipilersorneq ajorpugut. Misigisaq nuanneqaaq.
Nipilersortartut peqatigiiffianni siulittaasup, Inuk-milu erinartsortup, Inunnguaq Petrussenip Nanookip tusarnaartitsinera kalaallit nipilersortarnerani aallariarneq pingaaruteqarnerarpaa nunatsinniillu nipilersoriaatsimik nutaaliamik inunnut tusaatitsinerulluni.
- Kalaallit nipilersortarnerannut nipilersugaasalu pitsaasuunerannut takussutissiivoq. Nipilersortartut Nanookikkuunngitsut aamma allat nunarsuatsinni aamma nipilersorsinnaatitaanissaat neriuutigissavarput. Taamaammat Roskilde Festivalimi nipilersoqataasinnaanerat angisoorujussuuvoq nunarsuatsinnilu periarfissaqarnitsinnut aamma takussutissiivoq, Inunnguaq Petrussen oqarpoq.
