Nanook nunanut arlalinnut angalavoq

Erinarsuutit "Timmissat taartut", "Seqinitta qinngorpaatit" aamma "Ingerlaniinnaleqaagut", atorneqarmata Nanookkunnut Tivolimi Plænen-imi tusarnaariat erinarsoqataapput. Tusarnaariarpassuit Kalaallit Nunaat Tivolimi peqataaffigiartorlugu takkussorsimasut suli erinnanik amerlanernik atueqqusigaluarput.

- Misigisaq pikkunaqaaq. Tusarnaartut assorsuaq nuannerput erinarsoqataasaramik. Uagut aamma misigivugut nipilersorluarluta Tivolimi appinissarput sioqqullugu piareersarluarsimagatta, Christian Elsner qatanngutini Frederik Elsner peqatigalugu Nanookkunni marloriarlutik cd-nik saqqummersitsereersuni siuttoq KNR-mut oqarpoq.

Qanittumi Nanookkut Savalimmiuniipput ippassarlu tusarnaartitsinissaq sioqqullugu aamma sungiusarsimallutik.

- Frederik tupaallannguatsiaqaaq tusarnaartut taama ersaritsigisumik erinarsoqataammata, Christian Elsner oqarpoq.

Tusarnaartitsisarfillu Plænen inunnik tusintilikkaanik ulikkaarsimavoq nunatsinnut arlaatigut attuumassutillit Kalaallit Nunaat Tivolimi peqataaffigimmassuk ikinngutit ilisarisimasallu naapigiarlugit.

Nanookkut Nuummi angerlarsimaffeqartut suli akunnittarfinni najugaqarallassapput. Tassami nunani allanit tusarnaartitsinernik aaqqissuisut aamma qaaqqoreersimavaat.

- Finlandimi nipilersussaagut aggustip 18-at kingornalu Aasiannukassaagut Nipiaa Rock Festival peqataaffigiartorlugu. Tamatuma kingorna septembeirp arfineq pingajuat Islandimi nipilersussaagut, Christian Elsner oqaluttuarpoq.

Kalaallit Nunaat Tivolimi unnugu naggaserneqassaaq tusarnaartitsinermi ilaatigut peqataassallutik Sussat aamma Small Time Giants.