Nanook nipilersuusiaminnik nutaanik atuipput

Nipilersukkallu nutaat saqqummingajalersut, nuannarinnittunit Tivolimi Nunatsinnut tunngasunik ulloqartitsinernut atatillugu siullermeersumik ippassaq tusarnaarneqarsinnaapput. Naak nipilersukkat nutaat pineqarnerugaluartut, Nanookut ippassaq unnukkut Tivolimi nipilersornerminni atortakkatik nuannarineqarluartut aamma appisimaarpaat. Nipilersoreermata nipilersoqatigiit guitarertuannut erinarsortuannullu Christian Elsnerimut, Tivolimi nipilersornertik qanoq igineraat KNR-imit aperineqarpoq. - Assut pikkunaqaaq. Inoqarnermik aamma tupannalarpoq. Inuit ilaat oqartaramik, aggustip aallaqqaataanik aatsaat aggiasartut. Kisianni ukioq manna sialleraluartoq, aggertut amerlasoorujussuugamik, assut tupannaqaaq. Pikkunaqaaq - nuann, Christian Elsner akivoq. Nanookunni nipilersoqataasut nipilersukkamik nutaat tusarnaartunit qanoq igineqarnissaat appinnginnerminni pissanngatigisimavaat. - Soorunami annilanganalaarpoq, nipilersuusiavut nutaaq inuit qanoq tigussaneraat. Kisianni inuit nuannaarnermik, taavalu nipilersuusiavut nutaat tigulluarneqarnermik, pikkunaqaaaq. Tamatta iluatsitutut misivarput, Christian Elsner oqarpoq. Nanook Tivolimi siorna aamma nipilersorput. Cd-liaat nutaaq Ai Ai septembarip naalerneraniit pisiarineqarsinnaalissaaq. - Siullermiit allaaneruvoq, kisianni soorunami suli ilisarnarpugut. taalliornikkut assut pikkorillisimavugut, taalliavut massakkut allamut saalaaramik. Sumut tunngasuunerannik oqarusunngilanga, inuit paasiinnarumaarpaat. Nipilersoriaaseq ilisarnaraluarluni kisianni aamma nikeriarsimasugut assut malunnarpoq, Christian Elsner oqarpoq. Tivolimi Nunatsinnut tunngasunik ulloqartitsinerit ullumi nanginneqarput, ilaatigut sammisaqartitsineq Innersuit ingerlateqqinneqarluni, Hinnarik meeqqanut aliikkusersuilluni aamma erinarsoqatigiit Aqisseq erinarsorlutik, tumerparpaartartoq Trummelumsen tumerparpaarluni, erinarsortartoq Malu Rohmann Fleischer erinarsorluni aamma rockimik nipilersortartut Small Time Giants nipilersorlutik.