Assi: Nanook

NALILIINEQ Nanook-ikkut saqqummersitaat nutaaq tallimanik ulloriannappoq

Nuummi Qinngutsinni Stanislawip isikkiavianik taaneqartartumiillunga cd ”Pissaaneqaqisut” tusarnaarniarlugu ikkuppara, taanna nipilersoqatigiit Nanook-ikkut saqqummersitaraat.

Ukiap anoraannguata nillataartup ersakkut tagiartorujoorpaanga nunalu apummit nutaarluinnarmit qallerneqarsimasoq tummaarisara qeraarpaluttoq nuannaraara. Kitsissut imarlu itinneraartoq isiginnaaleruttorikka ”Tarningerparma”-p itertittutullusooq ippaanga.

-Aagiak kuunneq ajorpoq, manngerluni panerpoq, Christian K. Elsner erinarsorpoq.

Suna tamaat qulaarlugu erinarsorpoq, nipaatali aamma ersersippaa arlaanik navianartumik isertugaateqarneranik. Isussulluni, kappialalluni aappaatigullu aamma qaninniarpasittutut nipeqarluni erinarsorpoq.

Nanook-ikkut Facebookimi quppernerat uani takuuk

Inuit ataasiakkaat inuunerminni kiffaanngissuseqarlutik iliuuseqartarneri akisussaaffiginnittarnerilu, ilaatigut inuunerup siunertaanik apeqqusiilluni allaaserinnittartup atuakkiortup Ole Korneliussenip kiisalu oqaatsit allatut  isumaqalersorneqarsinnaasut atorlugit taalliortartup nipilersortartup Ole Kristiansenip ilisarnaatigisaasa ilagaat. Periutsit taakku marluk uani saqqummersitami atorneqarput. Oqaatsit amiilaarnaannartumik ammip ataatigut pulasutut ipput, qiiakka tamaasa anillatsillugit, annernaraluarlunili tusarnerpoq. Ilungersuummernartuliatut ippoq. Trombone imarmik qerneraartumik ikkarlunnillu uloriartunik takorluuilersitsivoq, guitarerpalummillu naggasiinera pikkunakullattuuvoq tamuallualaarnissamut tusarnaagassalluni tullianut piareersarnissamut periarfissiilluni.

 

Nanook-ikkut ukiut tallimat matuma siornatigut saqqummersitseqqaarnerat eqqarsaatigalugu taalliornerup tungaatigut nikeriarsimapput. Nikallungasarneq neriuummik nassataqartoq pillugu erinarsuusiortarnerat suli ilisarnaatigaat. Taalliortulli inuiaqatigiinni oqaluuserineqartunik allattalersimapput, soorlu silaannaap kissakkiartorneranut tunngasunik, assersuutigalugu siku aammat nanoq tammartajaalersoq pillugu taalliorsimasut. Kinaassutsimut tunngasunik aamma taalliaateqarput, kinaassuserput suminngaanneernersuunerpullu puigoqqunagit eqqaasinniarlutalusooq. Nipilersukkat tamarmik imminnut atasutut ipput, inuunerup ilungersunarsinnaaneranik ersersitsipput, aammali nuannersortai inissaqartinneqarlutik. Misigissutsit tungaatigut paasisassarsiorusukkaanni cd tamaviat tusarnaagassaavoq. Nanook-ikkut asanninnilersaarummik ilanngussisimapput, asanninnermut tunngasut erseqqissumik oqaatiginissaat ileqqorinngikkaluarpaat. Erinarsuusiortup aappaata, tassalu Frederik K. Elsnerip erinnani inuusuppaluttoq neriuuteqalersitsisorlu atorlugu asanninnilersaarutip oqariartuutaannik apuussivigaatigut.

-Saninnut pigavit eqqissiimivunga, asanaqigavit asannilerpunga, erinarsorpoq.

Erinarsornera ilunngunangaarmat allaanngilaq tarnerup nalunartullip, itisuup imartoqisullu isorisinnaasai tamaasa aqqusaarpallakkai.

Nanook-ikkut nittartagaat uani takuuk

”Pileritooq” allaanngilaq nipilersornerup silarsuaani paasisassarsiorneq. Tusarnaartartoq suliarilluakkanik nuannarisalik tassani eqqarsaatigineqarsimavoq. Illernartumik nipilimmik pattagiarsuarpalulluni aallarteriarluni tumerparpaanut piummartuunut killippoq. Nipilersuutit suut sumut atorneqassanersut eqqarsaatigilluarneqarsimasoq malunnarpoq aammali kingumut qiviarnertaqartutut ippoq. Soorlu qanga Aasianni meeqqat inuusuttuaqqallu sunngiffimmi ornittagaanni Illu-mi nipilersoqatigiit Inneruulat 1980-imi immiusseqqaarmata misigisaq, taamani inuusuttorsuit sukaruttornerit Karsten Sommer aamma Malik Høegh immiussisuupput. 2014-imut ikaarsaarutta Nanook indierockimik nuannarisallit tassani pineqarput, misigisarli taannaavoq. Allaanngilaq taamanimut uteqqilluni, qanga nipilersuutiviit atorlugit kiisalu erinarsoqatigiippalaartunik tulleertunik immiussisarallarmata taallallu inuit naleqartitaannut, ileqquinut nunagisamullu asanninnermik imaqarnerusarallarmata.

 

Qatanngutigiit Elsnerikkut taalliortuullutillu erinniortuusut saniatigut Mads Røn, Andreas Otte aamma Kim Heilmann nipilersuutit assigiinngitsut atorlugit nipilersortuupput. Nipilersortartut allat, soorlu agiartartoq, trompetertartoq, saxofonertartoq trombonertartorlu pulaartoralugit aamma immiusseqatigineqarsimapput. Saqqummersitap puua kusanaqaaq, aattut aappalutsigisumik sermitullu tungutsuaaritsigisumik qalipaateqarpoq angutillu utoqqaap kiinaa saqqaaniittoq takuneqarsinnaavoq, saqqummersitap nassuiaatitaata paatsiveerunnalaarnera tammartajaarnalaarneralu kisimik isorisassaapput. Nipinik sapiitsuliorluni misileraasunik taallanillu itisuunik nuannarisaqaruit pakatsinavianngilatit.

 

Ullorissat periarfissaasut arfinillit akornanni tallimat kusantariit tunniuppakka.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat