Nanook danskit TV-anni ullaakkut pulaartuusut
"Qaqqat Alanngui"-nik aaqqissuisut "Go'morgen Danmarkimi"-imi sapaatip-akunnerata siuliani ilisaritinneqareersullu, Nanook ullaaq manna ilisaritinneqarput.
Tivoliminngaanniit aallakaatitsisoqarpoq, Nanookikkut Grønland i Tivolimut atatillugu arfininngormat unnukkut tusarnaartitsipput.
Erinaq nuannarineqarluartoq "Seqinitta qinngorpaatit" "Go'morgen Danmark"-imik isiginnaartut tusarnaarpaat, nipilersoqatigiillu Nanookimik taaguuserneqarsimanerat nassuiarneqarpoq, soorlu aamma erinnani oqariartuutigineqartut nassuiarneqartut.
- Nuuteeraliarput neriunnermut asanninnermullu tunngassuteqarpoq, erinarsuusiavullu ilaatigut nikallungarpalussinnaasaraluartut, nuannersumik oqariartuuteqarput, Christian Elsner oqarpoq.
Nipilersortaroqatigiit nuussiamik nutaamik "Ai ai"-imik taaguuserneqarsimasumik septembarimi saqqummersitsissapput, erinnamillu kalaallisuumik "Go'morgen Danmark"-imi tusarnaartitsisinnaanertik tulluusimaarutigaat, erinnarli qallunaatoorrtoq siulleq saqqummersinneqangajalerpoq.