Nannuttassiineq Demokraatit apeqquserpaat

Aappaagumut 150-inik nannutassiisoqarnera Demokraatini ilaasortap Palle Christiansenip qisuariarfigaa. Pisuussutitta uumassusillit pisassiissutigineqartarneri nunanit allanit malinnaaffigineqartut arlaatigut innarlerneqarnissaat ilaatigut ernummatigaa.

- Biologit innersuussutaat aamma atornagu pisassiisoqaqqippoq. Taamaalilluta pinngortitap illersorneqarnissaanut inatsisiliarput aammaarluta unioqquteqqipparput.

Demokraatininngaanniit pisassiissutigineqartut qanoq amerlatiginersut qularnaarlugu paaseqaartinnagu pisassiisoqarnera peqataaffigerusunngilarput.

Taamaattumik pisuussutigut uumassusillit pillugit oqallittoqarnissaa ujartorparput. Qilalugartassiisoqarmat oqallinneq ujartorsimavarput massakkullu nannuttassiisoqarnerani aamma tamanna ujartoqqipparput.

Nunanit allanit pisuussutigut uumassusillit qanoq pisaritigisarnerigut manna malinnaaffigineqartorujussuuvugut. Nunanit allanit tatigineqarnitta innarlerneqarnissaa pinngitsoorusupparput.

Pinngortitaleriffiup pisortaata Klaus Nygaardip nannuttassiissutit isornartoqartinngilai:

- Piujuaannartitsinissaq anguniarlugu nannuttassiisoqarpoq, Klaus Nygaard taama oqarpoq.

Qanormi nannut amerlatiginersut ilisimanagit pisassiisoqarnera ilorianaateqarnersoq aperingatsinni ima akivoq:

- Kitaani nannut amerlassusaat ilisimaaralugu oqarsinnaavugut. Tunumili Canadamilu nannut amerlassusaat ilisimasaqarfigivallaanngilarput. Kisitsisoqareeeriarpallu kommuninut assigisaanullu tusarniaasoqartussaassaaq, Klaus Nygaard taama akivoq.

Nunatta Canadallu akornanni nannuttassat pillugit suli ullumikkut isumaqatigiissusiortoqanngilaq. Biologit naalakkersuinermillu suliaqartut arlallit siunissami nannuttassat suleqatigiinnikkut aaqqiiffigineqartalernissaat kissaatigineqarpoq.