Nannut pillugit USA-p politikkiata Canadami naalakkersuisunit sunniuteqarfigineqalernissaa Nunavumi namminersorneq pillugu suleqatigiiffimmit kissaatigineqalerpoq.
Uumasut nungutaalersutut ernumagineqartut allattorsimaffiini nannut allassimalissanersut, Washingtonimi maanna eqqarsaatersuutigineqarpoq – uumasunik illersuiniaqatigiiffiit arlallit piumasaqaataat tunngavigalugu, ilaatigut Greenpeacep.
Taamali eqqarsaatersorneq Nunavumi innuttaasut eqqarsarnartortaqartippaat, tamaanilu poliitikerit isumaqarput, Canadami naalakkersuisut piffissaagallartillugu akuliuttariaqartut.
- Inuiattut pisinnaatitaaffivut naalakkersuisutta illersortariaqarpaat – nannunniartarnerup maani inuutissarsiutigineqarnera kisiat pissutiginagu, piorsarsimassutsitsinnulli tamanna saassussineruvoq – nannut nungutaanissaminnut aamma navianartorsiunngillat, Nunavumi inatsisartuni ilaasortaq, Tagak Curley, CBC Northimut oqarpoq.
Nannunniartarnerup uumasunik illersuiniaqatigiiffinnit unitsinniarneqavinnissaa Tagak Curleyp ernummatigaa – taamaammat Canadami naalakkersuisut amerikamiut sunnerniartariaqarpaat.