Nannuttassat agguaanneqarput

Kalaallit Nunaanni ukioq 2006-imi nannuttassat katillugit 150-it kommuninut pernaammik agguaanneqaqqammerput.

Aalisarnermut Piniarnermullu Naalakkersuisup, Finn Karlsen-ip, KNAPK-mut KANUKOKA-mullu tusarniaareerluni agguataarinissaq inaarutaasoq aalajangerpaa. Nannuttassat ima aaguataarneqarput:

Upernavimmi 50-it, Qaanaami Illoqqortoormiunilu tamarmik immikkut 30-it Ammassalimmilu nannuttassat 20-iullutik.

Nannuttassanit pisassiissutinit 150-iusunit sinneruttut 20-it kommunit sinnerinut agguataarneqarnissaanni kommunit sinneruttut ataatsimik marlunnilluunniit nannuttassinneqassapput.

Kommunit pisassiissuteqarfiusut namminneq isumagisassaraat qinnuteqarsimasut akornanni pineqartunik piniarsinnaanermut akuersissutinik normulersoriikkanik tunniussillutillu agguataarinissaq, inuussutissarsiutigalugu piniarsinnaatitaasut kisimik nannunniarsinnaatitaanermut akuersissummik pisinnaatitaapput, kommunillu nannuttassat sinnerlugit pisaqartoqannginnissaa aamma namminneq nakkutigissavaat.