Nannuttassanik killilersuilerneq piniartut iluarinngilaat

Januaarip aallaqqaataani immikkut nannunniarsinnaanermut akuersissummik peqartalernissaq, ataasiakkaaginnarlugillu nannut pisarineqaqqusaalerpata, piniarnermut kultoorimut ileqqutoqaareersunullu innarliissasoq, Qaanaap eqqaani Savissimmi piniartoq Qaerngaaq Nielsen oqarpoq.

- Savissivimmi piniartuusugut akueriuminaatsittorujussuuarput, ilaannikkut uagut piniartut ullorpassuit nannunniarluta angalasaratta, ilaannikkut nanunik takunata, ilaannikkullu nannunik arlalissuarnik naapitaqarsinnaasarluta. Taamatut killilersuisoqalissappat, kultoorerput qangaaniilli angajoqqaatsinniit pisarput innarlerneqassaaq. Piniartut uagut qimmigut nannunniutitut perorsartarpagut, qimmillu nannunniutaasut angisoorujussuupput ilaannikkullu nannut qassiuneri apeqqutaatinnagit qimmit piummartuujullutik, aqukkuminaattuusinnaapput. Nannut amerlatillugit ataasiinnarlu pisarineqarsinnaalluni, sikulu saatsillugu inunnik navialittoqarsinnaavoq Qaerngaaq Nielsen oqarpoq.

Qaerngaaq Nielsen, Savissimmi piniartoq taama oqarpoq. Ukiarnerani piniartut tusarniaavigineqarnissaat Savissivimmi piniartunit iluarisimaarneqarpoq, neriuutigineqarporlu piniartut tusaaniarluarneqarumaartut.

Nunat avannaarsuaniittut aasaq manna naapeqatigiissimaneranni, nanoqassutsimik naliliinerat decembarip qaammataani saqqummiunneqassaaq.