Nannut USA-mi asaneqaqaat
USA-mi nannut ima asaneqartigaat, nannut uumasutut nungutaanissaminnik navianartorsiornerannik siunnersuuteqartoqarmat tamanna innuttaasunit tupinnaannartumik tapersersorneqarluni.
Avatangiiseqarnermut suliniaqatigiiffissuit siunnersuut nuannaarutigeqaat. Inuussutissarsiutinulli attuumassutillit isumaqarput, avannaarsuata nanorsua illersugaalissappat, taamaaliornissaq ajornartorsiutinik pilersitsiinnassasoq.
Nannut Alaskamiittut USA-mi innuttaasunik soqutiginnilersitsisimaqaat, qarasaasiat atorlugit quppersakkatigut inuit millionit affaat saaffiginnissuteqarsimapput nannut uumasutut nungutaalersutut isigineqarlutik allattaavinnut ilanngunneqarlutik illersorneqartariaqartut.
Pinngortitarlu pillugu Aqutsisoqarfik nalunaarpoq, uumasut allat taamatut siornatigut qisuariarfigineqan-ngisaannarsimasut.
Tamatumunngalu pissutaavoq, inuppassuit isumaqarmata nannut nungutaanissaannit annaanneqartariaqartut, silaannaallu allanngoriartornerata nannup pinngortitami uumaniarfii kalluaaviginngittoortussaanngimmagit.
Taama oqarpoq, avatangiisinut suliniaqatigiiffimmi
pinngortitami pisuussutit illersorneqarnissaannik siunnersuisoqarfik.
Nannut illersorneqarnissaannik soqutiginninnerujussuaq allartippoq, Naalagaaffiup pissutsinut ministeriaqarfia decembarimi siunnersuuteqarmat, nannut nungutaanissaminnik navianartorsiulersimasut, taamaammallu uumasut illersorneqartussaatitaasut allattorsimaffissuannut ilanngunneqartariaqarlutik. Taamatullu siunnersuuteqarnermut pissutaasoq tassaavoq, nunat issittut sikussaaraluttuinnarnerat 2000-kkullu naanngitsulluunniit Sikuiuitsoq Avannarleq sikuerumaartoq.
Nannullu illersorneqarnissaat pisortatigoortumik ippassaq tassa nipituuliuutigineqalerpoq.
Uumasunik illersuiniaqatigiiffiit nuannakkaluaqisut Alaskami uuliasioqatigiiffissuit tamanna nuannarivallaanngilaat.
Nannut nungutaannginnissaannit illersorneqartussanngorpata uumasullu nungutaalersut allattaavissuannut nannut ilanngunneqarlutik, taava USA-mi oqartussat CO2-mik silaannarmut aniatitsisoqartarneranik akuersissutinik tunniussisarnissaminni allatut iliuuseqartariaqalissapput.
Tamanna allaffissornerujussuarmik kinguneqassaaq, kinguaattoornernik aningaasartuuteqarnerulernernillu, taama oqarput, Alaskami gasimik qalluivissuarneersut Kattuffissuanneersut.
