Nannut saarngi sanngiillisimapput

Issittumi silap pissusaata allanngoriartornera, aamma mingutsitsineq, pillugit Københavnimi sapaatip-akunnera kingulleq ataatsimiinnersuaqarmat misissuinerit inerneri taakku saqqummiunneqarput.

Tunumi nannut saarngi sanngiillisimasut inernerni takuneqarsinnaapput. Nannut 1983-imiit 2001-ip tungaanut misissuivigineqarsimapput, taamungaannarlugu tigooqqaaffigalugit misiliutinik tigusiffigineqarlutik, aamma nannut ukiut 120-t matuma siorna pisarneqarsimasut taama tigooqqaavigineqarlutik misissorneqarsimallutik.

Toqunartut pillugit ilisimatuup, Christian Sonnep, misissuinermik ingerlatsisuusup, aalajangersumik oqaatigaa, akoorutissat suliffissuarneersut nannut saarngi nukillaartittaraat.

- Nannut issittumi uumanissaminnut naleqqussagaapput, taamaammat avatangiisit allanngornerannut mianernartorujussuullutik, Chritian Sonne oqarpoq.

Nannut angutivissat inersimasut saarngi nukillaarnerusartut ilisimatuut aamma paasivaat.

- Nannut angutivissat inersimasut saarngi ima ajortigisimapput, allaat saarngi napiasuunngorsimasinnaallutik iloqiannguussutigaluguluunniit, Christian Sonne oqarpoq.

Akuutissat navianartut nannut issuinut pisimappata, nannut issui mikinerusartut Christian Sonnep aamma paasivaa.

- Akuutissat annertuvallaat nannuniippata kinguaassiorsinnaanerannut amerlassusaannullu tamanna sunniussinnaavoq, ilisimatooq Christian Sonne oqarpoq.