Nannut pingasut toquppaat

-Igaat kingulliit qalareersut nerereerluta pujorsunnittumik kissartortussaalluta, oqarpallaleriallartoq, aajuku nanorsuit! Aakoorarsuit qulaatugitsinniit ammukartut, Aalisartoq Atammimmiu Vittus Poulsen oqaluttuarpoq. Taamaalisoq eqalunniarfimmiittut tamarmik umiatsiaaqqanut qimarrapput.

- Ningiorput taanna 70-it sinnerlugit ukioqartoq tupannermik qaatiguuni tiguniarpalukkaa suanngappara ”qaa tigunagu ammut qimaaniarit”, allatummi ajornartumik aallaammilluunniit tigummiaqannginnatta taakkulu nannut aggiinnaavillutik, Vittus Poulsen oqarpoq.

Eqalunniarfimmiittut aallaasinik tiguseriarlutik nioqqipput. Nannullu iluatsinngitsumik ungooraluarpaat.

- Tuperput aana miiterip affaajunngitsorluunniit qanillisimavaa, aserussappagu allamik pissaqanngilagut, ungooraluaratsigu qimaarusunnanilu allatut ajornaqimmat toquttariaqarparput piarai ilanngullugit, Vittus Poulsen oqarpoq.

Nannumillu qanillattortumik takuneq assut tupannarsimavoq.

- Piniakkamik aatsaat qimaasinnaangitsumik qanilliartuinnartumillu takulluni assut tupannarpoq, allat asimukassagunik aallaammik sillimmateqartassapput taamaattumik naammattooqqunagit, Vittus Poulsen sillimaqqusilluni siunnersuivoq.

Nannut neqaat meeqqerivinnut utoqqaat illuinullu agguaanneqarput.

Namminersornerullutik Oqartussat suliaq naammasseriarunikku nannut amii ammerivinnut akeqanngitsumik tunniutissavaat.