Nannut pillugit taasinermi EU illersuivoq
Nunat kikkut illersuisimanerannik ilisimatitsisuuvoq piniarnermut aalisarnermullu naalakkersuisoqarfimmi pisortaq Amalie Jessen.
Tunisassiat nannuneersut niuerutigineqarnerisa inerteqqutigineqalernissaannik Amerikamiut siunnersuutaat, Naalagaaffiit Peqatigiit uumasunut nungutaanissaminnik aarlerinartorsiortunut suleqatigiiffiata CITES-ip ippassaq itigartippaa.
Siunnersuutip taasissutigineqarnerani akerliullutik taasisut 62-iupput, akuersisut 48-t taaseqataanngitsullu aqqanillit.
Ippassaq aalajangiinerup sapaatip akunnerta tulliani oqaluuserineqaqqinnissaa, Nunatsinnit nunanillu nannunniarnermik ingerlatsiffiusunit maanna pissanngatigineqalerpoq. Ataatsimiinnerup tulliuttup inernerisinnaasai marluinnaapput, tassa ippassaq aalajangiineq atortussanngortinneqarsinnaavoq imaluunniit USA nutaamik siunnersuuteqarsinnaalluni.
Periarfissarlu kingulleq naalakkersuisoqarfimmi pisortap tusatsiarsimallugu oqaatigaa.
- Siunnersuut allanngortitaq saqqummiunneqassappat, nunanit nanoqarfiusunit soorlu Kalaallit Nunaannit, Nunavummit, Alaskamit, Chukotkamit aamma Svalbardimit kiisalu nunat allat siunnersuummut itigartitsisut taamaalillutillu ilisimatuut inassuteqaataannik malinnittut, suli sakkortunerujussuarmik akerlilersueqqissapput.
Nunarput nammineerluni tunisassianik nannuneersunik ullumikkut avammut tunisinissamik inerteqquteqarpoq, 2008-mi nungusaataanngitsumik pitsaanngitsumik piniartoqarneranik nalunaarusiaq pissutigalugu.
