Nannut pillugit piniartut ilisimasaat tuluttut saqqummerpoq
Angusat siusinnerusukkut kalaallisut qallunaatullu saqqummersinneqarsimapput kisiannili Canadami Alaskamilu aamma Issuttumi sumiiffinni allani kalaallit nannunniartarnerannik soqutiginninneq annertuallaaqimmat atuagaq maannakkut tuluttut saqqummersinneqarpoq, Pinngortitaleriffik taama nalunaarpoq.
2006-imi Kitaata Avannaani nannunniartartunik 72-inik misilittagartuunik apersuinerit tunngavigalugit atuakkiortoqarpoq atuakkamilu nannunniartartut 1952-miit 2005-ip tungaanut 588-eriarlutik nannunniartarsimaneranni pisartut sukumiisumik allaaserineqarput.
Piniarnernernit kisitsisit Kitaata Avannaani nannuttarineqartartut 1990-kkunniilli amerliartulersimanerannik ilimanaateqartitsimmata misissuineq aallartinneqarpoq. Allannguut tamanna silap pissusiata allanngorujussuarnera ilutigalugu aamma Kitaata Avannaata sikoqannginnerulernera pissutigalugu pivoq. Nannunnianit paasissutissat nannunniartarneq, nannut oqaluttuassartaat, silap allanngornera tamakkulu nannunut nannunniartarnernullu sunniutaat sukumiisorujussuarmik allaaserineqarnissaannut tunngavissiisuupput.
