Nannut pillugit nunarput Canada-miunik suleqateqalerput
Namminersornerullutik oqartussat Canadamilu oqartussat aappaagu aggustip qaammataani Canadami Nunatsinnilu nannuttassat pillugit suleqatigiinnissartik anguniarlugu ataatsimeeqatigiinnissaq pilersaarutigaat.
- Qilalugartassat pillugit massakkut suleqatigiinnerput ingerlalluarpoq. Nannuttassallu pillugit taamatut suleqatigiilluarnissarput neriuutigaarput, Piniarnermut Aalisarnermullu pisortaqarfimmi kontorchef, Ole Heinrich taama oqarpoq.
Namminersornerullutik Oqartussat 2005-imi Canadami Oqartussanik ataatsimeeqatiginninniarlutik isumaqateqarsimagaluarput.
- Nunatsinni nalunaarutit pisassiissutigisartakkavullu tamaasa inisseqqaarusussimavagut, taamaattumik ataatsimeeqatigiinnissarput aappaagumut kinguartipparput, Ole Heinrich nassuiaavoq.
Nannuttassat agguarneqarnerisa saniatigut tammaviutsussarsiorluni piniartitsisarnerit assingiimmik aaqqiivigineqarnissaat sulissutigineqarsinnaasoq Namminersornerullutik Oqartussanit neriuutigineqarpoq. Taakkualu sanitigut ilisimatusarnikkut suleqatigiinnerup nukittorsarneqarnissaa Namminersornerullutik Oqartussanit kissaatigineqarluni.
Nunatsinni Canadamilu nannuttassat biologit innersuussutigisaannit amerlanerupput.