Nannut nungutaalerunarput

Issittumi uumasut kunngiat nungutaalersutut nalilerneqarpoq. Alaska-mi nannunik ilisimatusartut misissuisarnerminni paasivaat, nannut imminnut nerisalernerat nalinginnaaleriartortoq. Nutaarsiassaqartitsivik AP taama allappoq.

- Nannut pissaaneqarniullutik imminut toqoraattarnerat nalinginnaavoq, imminnulli nerisalernerat nalinginnaanngilaq, Steven Amstrup, Alaskami ilisimatuutut sulialik oqarpoq.

Alaskami Canadamilu nannunik ukiuni kingullerni 34-ni misissuisarsimanerni nannut imminnut nerisalernerat aatsaat naammattoorneqartalerpoq.

Silaannaap kiatsikkiartornera pissutaalluni, Alaskami sikuusarnera sivikinneruleriartorpoq, taamaalillunilu natsit takkunniartarnerat aamma kingusinnerusukkut pisarluni. Nunarsuarmi mingutsitsineq pissutaalluni silaannaap kiatsikkiartornerata tamanna piliapalaarigaa ilisimatuut oqarput.

Ineriartorneq taama ingerlaannassappat, nannut ukiut 100-t qaangiuppata nungutaasimanissaat ilimanarsinnaasoq ilisimatuut oqarput, taamaammat nannut uumasunut nungutaalersunut ilanngunneqarnissaat siunnersuutiginiarneqarpoq.