Nannut mingutsitsinernit sunnertiasorujussuupput

Kalaallit Nunaata kangimut avannarpasinnerusortaani Svalbardimilu 1990-ikkunniilli misissuinerit takutippaat mingutsitsinerit nannunut sunniuteqartut. Misissuinerit Danmarkip Avatangiisinut Misissuisoqarfiani ilisimatuumit Christian Sonnemit qimerluualaarneqarsimapput. Berlingske Tidendemi taama allaaserinnittoqarpoq.
Allattoq Mads Lynge
januaarip 17-at 2010 17:23

Nannut kinguaassiuutaat ilaatigut allanngoriartorsimapput. Mingutsitsinerit nunanit allanit Issittumut annguttarput, mingutsitsinerillu ima annertutigipput nannut nappaatinut illersorsinnaassusiat sunnerneqartarluni, soorlu aamma kinguaassiorsinnaanerat eqqorneqartartoq.

Aatsitassat allallu uumasuni nerisariinni annertusiartortarpoq, nannullu puisittornermikkut mingutsitsinermit sunnertiasorujussuullutik.

Nannut Issittumiittut 20.000-it 25.000-illu akornanniinnissaat naatsorsuutigineqarpoq, mingutsitsinerulli nassatarisaanik nungukkiartornissaat ilimagineqarani.

- Silalli pissusaata allanngoriartornera pissutigalugu siku suli aakkiartuinnassappat nannut ajornartorsiulersinnaapput, Christian Sonne oqarpoq.

Misissuineq Environmental Internationalikkut saqqummersinneqarnikuuvoq. Nunarsuaq tamakkerlugu pinngortitap illersorneqarnissaanut suleqatigiiffissuaq IUCN Oslomi februaarimi ataatsimiittussaavoq, nannullu pillugit tassani oqallittoqarumaarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq