Nannut mattullugit isiginnaarneqartalissappat

Nanoq qaarsukkut sisoorluni immamut serpalittumik aqqarpoq, kalaaliaqqallu nannup inaata eqqaani isiginnaartut suaartarput; nanoq, nanoq. Anthon Frederiksenip siunersuutaa akuerineqassappat nunatsinni illoqarfiit ilaanni taamatut misigisaqartoqartalissaaq.
oktobarip 16-at 2007 17:14

Siunnersuutilli inatsisartuni ullumi oqaluuserineqarnissaa sioqqullugu, itigartitsissutigineqarnissaa Naalakkersuisut kaammattuutigaat.

Anthon Frederiksenip siunnersuuteqarnerminut takornariaqarnerulernissaa pissutiginerarpaa. Naalakersuisulli maluginiaqquaat nannut uumasunut eqqissisitanut ilaanerat, nunallu tamat aalajangersagaannit tamanna naqissuserneqarnikuusoq.

Nannut eqqissisimatitaanerisa kingunerisussaassavaat takornariat nannunik pinngortitamiittunik siunissami isiginnaarsinnaalernissaat, Naalakkersuisut allapput.

Aalisartut piniartullu kattuffiat, KNAPK siornatigut nannut uumasuusivinni mattusimaneqarnissaannut akerliullutik nalunaareernikuupput.

- Issittumi uumasut mattusimaneqarnissaat kalaallit aalisartut piniartullu anersaavannut ungasippoq. Piniartut uumasunik nujuartunik ataqqinninnerat uagut iliuusitsigut naqissusertariaqarparput, KNAPK-miit nalunaarput.