Nannut marluk Illoqqortoormiut illoqarfiata iluani takuneqarsimapput
Nannut marluk Illoqqoortoormiut illoqarfiata iluani ippassaq unnukkut takuneqarsimapput, taamaattumik Illoqqortoormiuni Politiit innuttaasut illoqarfikkuussappata mianersoqquvaat.
Allattoq Carla Davidsen
Nannut marluk Illoqqortoormiuni ippassaq takuneqarput. Aappaa angineq umiarsualivimmut arlaleriarluni qaqisimavoq, taanna kingullermik takuneqarsimavoq ippassaq unnukkut nalunaaqutaq qulit missaanni. Aappaa mikineq piniartunit Qinngaavani takuneqarsimavoq, illoqarfiup tungaanut sisoorsimalluni. Illoqqortoormiuni nittaallunilu persermat nannut takujuminaassinnaammata, illoqqortoormiormiut mianersoqquneqarput.
Illoqqortoormiuni politiassistent Steve Berthelsen taama ilisimatitsivoq.