Nannut marluk Akiani siumorneqarput
Nannut marluk Akiani, Kanajutsiaat Kanajorsuillu eqqaanni takuneqarsimasut, Aalisarnermut, Piniarnermut Nunalerinermullu Naalakkersuisoqarfiup nalunaarutigaa.
Arkivfoto
Allattoq Inge S. Rasmussen, Ivik Kristiansen
aggustip 25-at 2016 14:39
Inuit susassaqanngitsut eqqaaniinnissaat kissaatigineqanngilaq, inuillu aavartut, eqalunniat allallu nannunut mianersoqquneqarput. Piniarnermut Aalisarnermullu Nakkutilliisut nannut alakkarterpaat.
Nannunik takunnikkaanni, piniarnermut nakkutilliisoq, aalisarnermut, piniarnermut, nunalerinermullu naalakkersuisoqarfimmi pigaartup oqarasuaataa imaluunniit Nuummi politiit erngertumik attavigineqassapput.
Aammattaaq oqarasuaatikkut ammasarfiit nalinginnaasut avataatigut naalakkersuisoqarfik attavigineqarsinnaavoq. Pigaartullu oqarasuaataata normua tassaavoq 482520 imaluunniit 55 33 42
APNN-ip ilisimatitsissutigissavaa, Nuup eqqaani nannuttassat pisassiissutaasut tamakkerneqarnikuummata.
