Nannut Københavnip Uumasuusivissuaniittut sermimik tonsip affaanik pajunneqartut

Danmarkimi kiassiorneq ilaasa ilorrasimaarutigineq ajorpaat, tassami nannut marluk Københavnip uumasuusivissuaniittut kiassuaq ilorrisimaarutiginngimmassuk, Danmarkip Radioa taama allaaserisaqarpoq.
 
Taamaammat uumasuusivik sermermik 500 kiilunik oqimaatsigisumik nannut marluk nillarsaatissaannik inniminniisimavoq.

Nannut sermeq ilorrisimaarutigigaat uani takusinnaavat

Sermeq taanna 500 kiilumik oqimaatsigisoq pingasunngormat nannut inaannut, Den Arktiske Ringimut eqqunneqarpoq. Nannullu ingerlaannaq taanna siku ornippaat.
 
Aamma aalisakkat sikunik qallerneqarsimasut nannunut nerukkaatigineqarput.
 
- Nannut imermut aqqartinniarlugit taakkua aalisakkat qerisumik qallerneqarsimasut imermut igittarpagut, taava nannup imermiinnermini taanna siku aalisakkanik imalik kimmarlugu nererujoortarpaa, Københavnip uumasuusivissuani aqutsisoq Lars Holse taama oqarpoq.