Nannut kinguaassiuutaat soqutigilluarpaat

Ilisimatusartup Christian Sonnep Århusimi Universitetimi Danmarkimi avatangiisinut misissuisoqarfimmeersup misissuinermini paasisani, tassa akuutissanik mingutsitsinerup kinguneranik Issittumi nannut kinguaassiuutaasa minnerulersimanerannut tunngasut saqqummersippai.

Saqqummersitsinerup siunertaraa, inuit kisimik nuannisarnissartik piinnarlugu atoqatigiinneq ajornerisa paasissutissiissutiginissaa. Tassami uumasut assigiinngitsut akornanni atoqatigiinneq pingaartorujussuuvoq, taama oqaluttuarpoq Museum of Sex-imi sulisut ilaat Sarah Jacobs. Uumasulli mingutsitsinerup kinguneranik kinguaassiorsinnaanerisa ajornerulernerat, Christian Sonnep Tunumi nannunit mingutsitsinermit eqqugaasimasunit paasisai ilanngullugit takusassiarineqarput.

Taassuma misissuisut allat peqatigalugit 2006-imi nannut 99-it misissuiffiginerisa inernerat saqqummiuppaa, misissuinernilu ilaatigut paasineqarpoq, nannut usuisa saanertaat 40 procentit angullugit milleriarsimasut issuilu 25 procentit angullugit minnerulersimasut. Paasisat tamakkua New Yorkimi uumasut atoqatigiittarnerat pillugu saqqummersitsinermi ilaatinneqarput, taamaalilluni akuutissat assigiinngitsut qinersit aammut akuliussaannut ajoqutaasarnerat takussutissaqarniassammat.

- Kinguaassiuutit minnerulernerisigut siunissami immaqa nannut kinguaassiorsinnaanerat minnerulersinnaavoq, taamalu Tunumi nannut amerlassusaannut ernumanarsinnaalluni, Christian Sonne Danmarkimi avatangiisinut misissusoqarfimmeersoq oqarpoq.

Christian Sonnep Avatangiisinut misissuisoqarfiup atoqatigiittarneq pillugu saqqummersaitsinermi aatsaat peqataaneralugu oqaatigaa.