Nannut killilersorneqalernissaat aamma ajunngilaq

Nannunik pisassiisalernissaq avanersuarmi piniartunit assigiinngitsumik isumaqarfigineqarpoq. Qaerngaaq Nielsen, piniartoq Savissivimmiu ippassaq oqarpoq nannut killilersugaalernissaat akueriuminaatsikkini, killilersuineq nannunniartarnermut kulturitoqqamik innarlissammat. Aaamali allatut isumaqartoqarpoq, tassa Qaanaami piniartut peqatigiiffianni siulersuisuni ilaasortaq Jens Danielsen isumaqarpoq nannut killilersungaalernissaannut piffissanngorsimasoq:

- Paasisimangiga isumasiuinermi amerlanerit taanna tapersersoraat, killiliisoqarnissaa.

Jens Danielsen isumaqarpoq nannunik killilersuinissaq siunissamut iluaqutaajumaartoq.

- Piniartup saniatigoorisinnaagamiuk, tassanilu aamma eqqarsaatigaakka nannunniartitsisalernissat.

Savissivimmiu Qaerngaaq Nielsen isumqarpoq nannunniartarnermut kulturitoqaqa innarlerneqassasoq, tamannalu ilumooralurtoq Jens Danielsen oqarpoq, kisianni:

- Tusaqqaarakku akerliusunut ilaasimagaluarpunga, kisianni paasigakkuli ajunngitsortai sumiinnersut tapersersuilersimavunga.

Ajunngitsortai suunersut aperigatsinni akivoq:

- Killilersuisoqalerpat nunarsuarmioqatitsinnit akuerisaalluta pinialutsitsisinnaalissagatta.

Ataasiakkaarlugit nannuttassiisarnissaq, tassa ataatsimik nannukkaanni allagartamik nutaamik aalleqqaarluni pisaqaqqissinnaasarnissaq, Jens Danielsen-ip eqqarsarnartoqartippaa:

- Uangattaaq taanna soorunami iluarivallaanngikkinga, nanoqartarmat soorlu utoqqarnik marlunnik nuliariinnik, arnaviaq utoqqaq angussuarlu utoqqaq. Sooruna ajoraluarpoq aallaraaanni ataasiinnarmillu pisaqartussaalluni, kisianni piniartut ataatsiinnaallutik aallartannginnamik, nannunniaraangamik ikioqatigiittaramik.

Nannunik pisassiisoqartalerpat qimit nannunniutit sunnerneqassapput tamanna pillugu, Jens Danielsen ima oqarpoq:

- Qimmit amerlanerit siulitik malillugit qaasuttuusarput nannullu tipaa naagaangamikku soorunami pileritsattarput periusitoqarigamikku. Taamaakkaluartorli isumaliortunga tamanna akornutaavallaassanngitsoq, piniartut qimmiminnik sungiusaariaasiat assigiinngitsorujussuugami.

Qaanaami piniartut peqatigiiffianni siulersuisuni ilaasortaq piniartorlu Jens Danielsen aamma oqarpoq Avanersuarmi ukiaru tusarniaasoqarnissaanut piniartut erinisuttut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat