Illoqarfik Ryrkajpijimik ateqarpoq, WWF-illu nannut 50-it missaanniittut illoqarfiup eqqaaniinnerarpai. Illoqarfiup qanittuani imaani nannut nalinginnaasumik nerisassarsiorfigisartagaanni sermeq saattunnguuvoq. Toqqorsivimmit assiAssi: Nukaaraq Knudsen/KNR

Nannut kaattut 50-init amerlanerusut russit illoqarfiata eqqaaniittut

Ruslandip avannaani kangisissumi kialaarluni ukiornera nannut nerisassaaleqilernerannik kinguneqarpoq.

Ruslandip avannaani kangisissumi nalinginnaanngitsumik kiattumik ukiorpoq, tamanna pissutigalugu nannut illoqarfinnut qanillattorlutik nerisassarsiorniarsarilerput.

Pinngortitaq pillugu nunarsuaq tamakkerlugu suliniaqatigiiffik, WWF taama oqarpoq.

Illoqarfik Ryrkajpijimik ateqarpoq, WWF-illu nannut 50-it missaanniittut illoqarfiup eqqaaniinnerarpai. Illoqarfiup qanittuani imaani nannut nalinginnaasumik nerisassarsiorfigisartagaanni sermeq saattunnguuvoq.

AAMMA ATUARUK Nunarsuarmi aatsaat taama kiatsigisoq: Oktobarimi ukiuni 40-ni aatsaat taama kiatsigisoq

- Nannut tamangajammik saluttunnguupput, Tatijana Minenko nannut inuillu naapinnissaannik pinaveersaartitsinermik suliaqartuni siuttuusoq oqarpoq.

Nannut nunap immikkoortuani tassani takkuttarnerat nalinginnaasooreerpoq, nannulli taama amerlatigisut ataatsikkut sumiiffimmiittarnerat qaqutigoortuuvoq, nalunaarummi allassimavoq.

Sila decembarip aallartinneraniilli nalinginnaanngitsumik kialaarpoq. Paasissutissallu naapertorlugit imaq sikujartulerpoq, sikuli saappallaarmat nannut sikumiissinnaanngillat.

Nanoq kaattoq sumiiffigisartakkaminit kilometerinik hunnorujulikkaanik kujasitsigisumiittoq qaammatialuit matuma siorna nassaarineqarpoq.

Nanoq illoqarfimmi Norilskimi nerisassarsiortoq paatsiveerusimarpasillunilu saluttuuvoq, kukiilu maqullummik ulikkaarlutik.

Nannup silaarunnartumik aallaaneqariarluni uumasuusiviliaanneqarneranik tamanna kinguneqarpoq.

AAMMA ATUARUK Ilisimatuut COP25-ip aallartinnginnerani silap pissusia nikallunganartutut isigigaat

Aammattaaq Ruslandip issittortaani illoqarfik Novaja Zemlja Ruslandip illoqarfiisa pingaarnersaannit 2000 kilometerinit avannarpasitsigisumiittoq nannunik kaattunik februaarimi aamma ajornartorsiuteqarpoq.

- Nannunit qimaanissaq ajornartuusoq, sumiiffimmi tassani aqutsisoqarfik taamani aarlerisaarivoq.

- Nannut nerisassanik amigaateqarnerat pissutigalugu nannut nerisassanik allanik nassaarnialersinnaapput, matumani inuit ilanngullugit.

/ritzau/dpa

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat