Silaannaap kissatsikkiartornerata kinguneranik nannut Alaskap eqqaani puttaassaarullutik ipisarsimasut assinganik nunatsinni pisoqaratarsinnaavoq – apeqqutaaginnarpoq qaqugu, taama oqarpoq Pinngortitaleriffimmi biologi Erik Born.
Biologit USA-meersuut 1986-imiilli timmisartumik Alaskap avannaata sineriaa sinerlugu arfernik kisitsisarput. Ukiuni tulliuttuni iluatsillugu miluumasut allat alapernaarsorneqartalerput.
Siorna silaannakkut alapernaarsuinermi peqataaninni takusinnaavarput siku kilometerinik 100-nik arlalinnik avasillisimasoq. Nannut 51-it naluttut takuagut; kingusinnerusukkullu anorersuareernerata kingorna nannut sisamat ipeqqasut takuavut. Silaannaallu allanngorneranik pissuteqartumik naatsorsuutigisinnaavarput nannut toqorarnissaat.
-Kalaallit Nunaata sineriaanissaaq sikukinnerulersimanerata kingunerilereerpaa nannut sinerissatsinnit avasinnerujussuarmiittalerneri. Tunumi, Qimusseriarsuarmi Davis Stræde-milu annikinnerusumik sikoqartalersimanera malunniutereerpoq. Naatsorsorneqarsinnaalerpoq sikumi angalasinnaajunnaarunik timaasiortalissasut, nerisarliornerulissasullu.
-Nannummi timaasiornerulerpata naatsorsuutigissavarput ajornannginnerusumik pisarineqartalernissaat. Tassuunakkullu piniarneqartarnerisa aalajangersaaffiginerisa allanngortinnissaat pisariaqassaaq, Erik Born naggasiivoq.