Nannut ipillutik toqunissaat aarleqqutigaat
Nannut qulingiluat Alaskap avannamut kippasissortaani Tjuktiit imartaaniittut, ipillutik toqunissaat maanna aarleqqutigineqarpoq. Nannummi sikutamiikkaluarput, sikutarli maanna aassimalluni. Tuluit aviisianni, The Telegraphimi, taama allaaserinnittoqarpoq.
Allattoq Louise M. Kleemann
septembarip 02-at 2008 12:29
Ilisimatuut timmisartortillutik nannut Tjuktiit imartaani saperngusut paasivaat.
Nannut allat imaannarsuarmiinnertik pissutigalugu ipillutik toquinnarnissaat, Pinngortitaq pillugu nunarsuaq tamakkerlugu suliniaqatigiiffiup, WWF-ip aarleqqutigaa.
- Issittup imartaa isorartoorujussuuvoq, nannullu imaannarsuarmi naluttut qulingiluat siumorsimagaanni ernumanartoqarpoq, ilami nannut allat taamatut aamma atugaqarnissat ilimanarsinnaassammat, WWF-ip Alaskami pisortaa, Margaret Williams, The Telegraphimut oqarpoq.
Nannut nallorissuusut naluneqanngikkaluarpoq, nannulli pineqartut nunamit 643 kilometerinik ungasissulimmiimmata ernumassutigineqarput.
