Nannut illoqarfinnut qanillivallaartarput

Nannut amerliartuinnartut illoqarfinnut qaninngoortalersimapput, taama Sermitsiaq allappoq. Ukioq mannaannaq nannut arfineq-marluk illoqarfinnut qanillivallaartut toqunneqartariaqarsimapput.

Silap kissakkaluttuinarnera ilutigalugu, sikup nungukkiartornerani nannut sinerissami inulinnut qanilligaluttuinnarput.

Nannut amerlasuut perlilerlutik illoqarfinnut qanillisarput.

- Nannut piarallit immikkut akuersissummik peqanngikkaanni toqunneqaqqusaanngillat. Inuit immikkut ittumik akuersissummik piumasaqaraangata, siunnersoqqaartarpagut, nannut qanillivallaartut qimaatinniartassagaat, qimaatinneqareeraluaraangamilli aqaguani ingerlaannaq illoqarfinnut uteqqittarput, allatullu ajornartumik aallaaneqarnissaanut immikkut ittumik akuersissummik tunniussisariaqartarpugut, Lars Geråe pinairnermut pisortaqarfimmi allaffimmi pisortaq Jyllandspostenimut oqarpoq.

Nunat nanoqarfiusut, tassalu USA, Canada, nunarput, Norge Rusland-ilu qanittumi ataatsimeeqatigiipput, tassanilu eqqartorneqartunut ilaavoq, nannut pillugit paasissutissanik tunioraaqatigiinnerulernissaq, aammalu nakkutiginninnerulernissaq.