Nannut illersorneqarnissaat anguniarneqassaaq
Kalaallit Nunaat nunallu issittumiittut nannut illersorneqarnissaannut tunngasunik pilersaarusiussasut, Piniarnermut Naalakkersuisoqarfimmi pisortap Amalie Jessenip Tromsømit oqaluttuaraa.
- silap kiatsikkiartornerata kinguneri eqqartorneqartut ilagaat. Tassa sikup aakkiartornera ilutigalugu nannut uumaffiisa nerisarfiisa ikiliartornerat, pingaartumik Ruslandimit Norgimillu eqqartorneqarput.
Nannut piniagaanerat ikiliartuutaanngitsoq, kisiannili silap pissusaata allanngoriartornerata kinguneranik nannut nungunnissaat ernummatigineqarpoq. Taamaattumillu piffissaq ungasinnerusoq isigalugu iliuuseqartoqartariaqartoq isumaqatigiissutigineqarpoq, Amalie Jessen oqarpoq.
Nunat ataasiakkaat silap pissusaata kiatsikkiartorneranut millisaataasinnaasunik iliuuseqartariaqartut aamma nungusaataanngitsumik atuinissaq eqqarsaatigalugu aqutsineq nalimmassarneqassasoq ataatsimiinnermi isumaqatigiissutigineqarpoq.
Pingaarnertut aamma eqqartorneqarput nannut uumaffii, soorlu siku allallu nannumut pingaarutillit, soorlu piaqqiorfii. Tassami piaqqiorfiisa eqqaanni inuussutissarsiornikkut ingerlatsineq, soorlu uuliamik gassimillu ujaasinerit annertusiartormata. Tamakkuananilu nannunut akornusersuutaanngitsumik ingerlanneqartariaqartut oqaatigineqartoq, Amalie Jessen ilisimatitsivoq.
Eqqartorneqartut ilagaat, akuutissat arrortinneqarsinnaanngitsut aamma mingutsitsineq nannunut qanoq kinguneqarsinnaanersut aamma qanoq pinaveersimatinneqarsinnaanersut. Kisianni matumani nunarsuaq tamakkerlugu iliuuseqarnissaq pineqarpoq, nunalli ataasiakkaat iliuuseqarnissaat pingaartinneqarluni, soorlu paasissutissanik paarlaateqatigiinnikkut anguniarneqarsinnaasoq.
Nannut pillugit Tromsømi isumasioqatigiinnermi ukiut allortarlugit ataatsimeeqatigiittoqartarnissaa aalajangiunneqarpoq. 2011-mi Canada qaaqqusisuuvoq Ruslandilu 2013-imi qaaqqusisuulluni.
