Nannut ikiliartuinnartut
Amerikamiut Canadamiullu ilisimatuut Alaskap ilaani qanoq nanoqartigineranik nakkutiginnittut oqaatigaat, ukiut hunnorujulikkaat nikinneranni ukiuni qulini siullerni nannut 40 procentimik ikileriarsimasut.
Ilisimatuut oqaatigaat, nannunut ukiut ilungersunarnerpaat tassaasut, 2004-mit 2007-mut.
Taamani siku ima saatsigisarpoq, nannut sikumi puisinik inuussutissaminnik pisaqarsinnaanerat ajornangajalluni.
- Nanuaqqat 80-it Alaskami 2004-mit 2007-imut naammattoorneqartut, marluinnarnik sinneqartut ilisimavarput, Jeff Bromaghin, USA-mi ujarasiuutut misissuiffimmeersoq oqarpoq.
Nunap ilaani tamaani nannut 2010-mi 40 procentinik ikileriarsimapput, 900-t missaannik amerlassuseqalerlutik.
Nanoqassutsimik misissuineq atuagassiami Ecological Applicationsimi saqqummiunneqassaaq.
Misissuinermi paasisat ilagaat, 2007-ip kingorna nannut atugaat pitsanngoriarsimasut, sulili pitsaavallaaratik.
Ukiuni qulini misissuisoqarnerata nalaani nannut inuusunnerit ikiliartuinnavissimasut, ilisimatuut oqaatigaat.
Immap sikuusarnerata annikilliartuinnarnera ajornartorsiutaavoq. Issittumi siku milliartuinnavitsillugu nannut ilungersunartorsiuleraluttuinnartut, Amerikamiut Canadamiullu ilisimatuut misissuisuusut oqaatigaat.