Nannut eqqissisimatitaanerat aalajangiusimavaat
Nanoq uumasunut nungutaanissamut navianartorsiortunut suli ilaavoq - tamanna USA-mi eqqartuussiviup aalajangerpaa. Eqqartuussiviup aalajangernera naalagaaffimmut Alaskamut nakkariarneruvoq, tassami nannut piniarneqartalernissaat Alaskami kissaatigineqarsimagaluarmat.
Allattoq Carla Davidsen
Immami sikuerukkiartornera pissutigalugu nannut illersorneqarnissaannut tunngavissaqartoq, eqqartuussisup aalajangernermini tunngavilersuutigigaa, aviisimi The Los Angeles Timesimi allaaserineqarpoq.
Nannut nungutaanissaminnut aarlerinartorsiortutut USA-mit nalilerneqarput, 2006-imiillu piniaqqusaajunnaarlutik.
Nannut eqqissisimatitaajunnaarnissaat Alaskami piniartut peqatigiiffiinit kissaatigineqarsimavoq, tamanna pisariaqanngitsoq isumaqarlutik, nannut inatsisitigut allatigut illersorneqarmata.
Nannut nunarsuarmi tamarmi 20.000-it 25.000-illu akornanni amerlassuseqarsorineqarput.