Nannut Chukchip imartaaniittut ilimagineqaraluartutut ikiliartunngitsut

Nannut Siberiami Chukotkap aamma Alaskap akornanniittut ikiliartunngillat.
Assi © : Vilhelm Lynge Hard /KNR
novembarip 20-at 2018 07:42
Nutserisoq Jaaku Lyberth

Nannut Alaskap Ruslandimilu Chukotkap akornanniittut naatsorsuutigisamit amerlassussiat ajunnginnerusoq ilisimatuussutsikkut misissuinermit paasisat nutaat sapaatip akunnerani uani saqqummiunneqartut ersersippaat.

Eric Regehr, ilisimatuussutsikkut misissuinermi aqutsisuusoq nutaarsiassaqartitsivimmut Associated Pressimut oqarpoq, tamanna nutaarsiassatsialaasoq aamma piniartunut Inuppiannut.
 
Ilisimatuussutsikkut misissuinerup ukiunik qulinik sivisussuseqartup takutippaa,  tamaani nannut 3000-it missaannik amerlatigisut ikiliartunngitsullu.

AAMMA ATUARUK Nannut Savissivimmi innuttaasut piliaannik nerisut

Nannut misissuiffigineqartut piffissap sivisunersaani nunamiittarput, nannunut allanut saniliullutik, ullunillu 30-nik ikinnerusunik sikumiittarlutik.

Taamaattumik immap sikuata annikillineranit sunniuteqanngilaq, soorlu Beuafortip imartaani Alaskap avannaanniitumi immap sikuata annikinnerulernera sunniuteqarsimasoq.

Alaskap Ruslandillu akornanni siku aakkaangat imaluunniit saappallaaleraangat nannut Chuckimiittut Ruslandimi qeqertamut Wrangel Islandimukartarput tassani nerisassaminernik nassaarsinnaasaramik.

Ilisimatuussutsikkut misissuinerup takutippaa, nannut amerlassusiat suli ajunngitsoq,  avatangiisiminnullu ajunngitsumik naleqqussarsimasut, naak tamanna ilimagineqarsimanngikkaluartoq.