Nannut Canadap avannaata kitaanut nuukkiartuaartut
Ilisimatusarnikkut atuagassiami Plus One-imi misissuinerup saqqummiunneqartup tamanna paasinarsisikkaa, aviisimi Politikenimi ullumi allaaserineqarpoq.
Sikup aakkiartuinnarneratigut nannut puisinik piniarsinnaanerat ajornakusoornerulerpoq. 1979-ip kingorna immap sikua ukiuni qulikkaartuni 9 procentimik minnerulertarpoq, tamatumalu nunarsuup kiatsikkiartornerata kinguneranik ingerlaannarnissaa naatsorsuutigineqarluni.
Immami qeqertarpassualimmi, qeqertat 36.000-it 1,4 millionit kvadratkilometerinik annertussusilimmi siaruarsimaffigisaanni, immap sikuata aakkiartornera arriinnerusarpoq. Ilaatigut avannarpasissumi inissisimanera pissutigalugu, misissuinermik nalunaarusiortut pisortaat Elizabeth Peacock, U.S. Geological Survey-imeersoq oqarpoq.
Nannut tamaanga nikikkiartornerisa ingerlaannarnissaa, ilisimatuut naatsorsuutigaat.
Nannut Alaskameersut, Ruslandimeersut, Canadameersut, Nunatsinneersut Norgemeersullu 2.800-ngajaat dna-vinit kingornuttakkat misissuinermi tunngavigineqarput. Nannut Issittup kangisinnerusortaaneersut, tassa Canadap issittortaaneersut, Nunatta kangiata imartaaneersut aamma Sibiriameersut qeqertarpassuarnut nuukkiartuaartut misissuinerup takutippaa.