Nannut British Columbiamiittut ikiliartorsorineqarput

Eqaluit 10 millioninit amerlanerusut suffiartorniarlutik Fraserip kuuatigut majortaraluarput, eqaluilli 1 millionit missaat ukioq manna majortut ilimagineqarpoq, eqalunnianullu tamanna eqquinerluppoq.

Nannulli maanna ikiliartupiloortut aamma oqaatigineqarpoq, sumiiffiillu ilaanni aamma tammavissimallutik.

Nannut allarsuit eqaluttornerusarput, eqaluit ullormut qulit sinnerlugit nerisarisarsinnaallugit. Eqaluilli ikiliartornerisa kingunerisaannik nannut perlilerput, paarnanillu taamaallaat nerisaqalernertik pissutigalugu perlerarlutik. Ilisimatuut taama oqarput.

Eqaluit taamatut ikiliartupiloornerat ukioq manna taamaallaat pisoq neriuutigineqarpoq, aappaagu aasakkut ukiakkullu amerlinerusinnaanissaat neriuiutigineqarluni.

Eqaluit nannullu British Columbiami ikiliartupiloornerat pinngortitami uumassuseqatigiiaanut sunniuteqarsinnaavoq, pinngortitap ataqatigiinneranut sunniuteqarsinnaalluni.

Eqaluit nannullu pinngortitamut pingaarnuteqarnerat saniatigut takornarianut indianernullu aamma pingaaruteqarput, tamaani aningaasarsiutigineqartarmata.