Nannut Baffinnip Kangerliumarnganiittut assortuussutaapput

Nannut Baffinip Kangerliumarnganiittut Nunavummi piniartut biologillu suli isumaqatigiinngissutigaat.
septembarip 29-at 2009 07:42

Nannut pisarineqarsinnaasut amerlassusissaat oqartussat sapaatip-akunnerata massuma ingerlanerani oqallisigisussaavaat. CBC Northip nittartagaani tamanna atuarneqarsinnaavoq.

Nannut tamaani piniapilunneqarnerat, Nunavummi oqartussat aarleqqutigaat, piniarnermillu aqutsisut nannuttassanik ikilisigallarnissamik nannunniarnermilli unitsitsigallarnissamik piumaffigineqarput.

Nannunniarneq qaammatip tulliani aallartittussaavoq.

Piniarnermik aqutsisut, piniartut biologillu Iqalunni innuttaasunik ataatsimiititsinermi ullumi pisussami tusarniaavigineqassapput.

- Soorunami maanna isumaqatiginngittoqarpoq, piniartulli qangaanilli ilisimasaat tunngavigalugit ilisimatuussutsikkullu misissuinerit tunngavigalugit aalajangiiniartuaannarpugut, Harry Flaherty, piniarnermik aqutsisut siulittaasorigallagaat, CBC Newsimut oqarpoq.

Nannut Baffinip Kangerliumarnganiittut Nunavummiit Kalaallit Nunaanniillu piniarneqartarput, piniartarnerit nunanit taakkunanit immikkut aqunneqarlutik.

Kalaallit Nunaata nannuttassai 68-iupput.