Nannut aningaasarsiutiginissaannut periaatsimik nutaamik Russit nassaarsimapput

Canada nunani kisiartaalluni "timersuutitut" nannunniarfigineqarsinnaavoq; nannullu amiata nunanut allanut eqqunneqarnissaa inerteqqutaanani. Aammattaaq nannup amiata nunamit anninneqarnissaanut inerteqqutaanngitsumillu tuniniarneqarnissaanut nunani kisiartaalluni CITES-imit akuersissummik tunniussisinnaatitaavoq.

CITES tassaavoq nunani tamalaani suliniaqatigiiffik uumasunik nujuartanik niueruteqarnermik nakkutilliisoqarfiusoq.

Ajornartorsiutaasoq tassaavoq nannut amiisa Ruslandimi piumaneqartupilussuuneri, Ruslandimili nannunniarneq inerteqqutaalluni. Russit pisuut nannup amianik angerlarsimaffimminni pigisaqarusuttarput, tamanna akimarpaluttutut isigigamikku. 

Ruslandimi unioqqutitsilluni nannunniartoqartarpoq. Nutaarsiassaqartitsivik Canadian Press naapertorlugu piniaqqusaanngitsunik piniartut nannut Canadami pisaat CITES-imit akuersissutaat pisiariniarsarisarpaat, nannut amii Ruslandimeersut Canadamit eqqunneqarsimasutut, taamatullu inerteqqutaanngitsutut isigineqalernissaat anguniarlugu.

CITES-imit akuersissutit aamma nannut amiinit Canadamit Ruslandimut eqqunneqarsimasunit tillinneqartarput. Qanittukkut CITES-imit akuersissutit marluk internettimi 1000 dollarsilerlugit tuniniarneqarsimapput, tassalu 5600 koruunilerlugit.  Piniaqqusaanngitsunilli piniartunut tamanna iluanaaruteqarfiulluartarpoq, nannummi amia akuersissutitalik 50.000 dollarsilerlugu tunineqarsinnaavoq, tassalu 250.000 koruunilerlugu.