Nannut amii qapiarpaat

Politiit angallataat Sisak Atammimmiit nannut amii nassarlugit Nuummut utereersullu Ammerivik Kittani ammerisut alakkallatsiarpagut.

Hansiinaaraq Petersenip nannut niaqorsuata amia suliarileruttoraa Nuummi Ammerivik Kittanut iserpugut. Nannut pingasut amii qapiarlugit ulappupput. Hansiinaaraq Petersen qapiartoq nassuiaatipparput.

- Amii soorunami iperluinnarput kajulaaraluarlutillu kisianni kusanassamaarput.

Nannut nutaanngilingajassimammata ini qapiarfigineqartoq tikkaarippoq.

- Nannut tippangajaavissimagamik kisianni ajunngillat amiisalu meqqorsui katannatik.

Nannut piaraat 122 centemeterit missaanni angissuseqarput arnaviarlu 246 centemeteriulluni.

- Aatsaat nannut amiinik qapiaalluta misiliivugut, kisianni nannut amii qapiarlugit ajunngillat oqitsuararsuullutillu, nuanneqaat suliaralugit.

Ammerivik Kittani nannut amii kamiliornermi aaqqatiliornermilu quliutissatut atorneqassapput, nannuaqqallu amii kusassaatissatut atorneqarumaarlutik.

Ukiut marluk matuma siorna nannut aalajangersimasumik amerlassusilerlugit pisassiissutigineqartalermata, pisassiissutit saniatigut pisarineqartut pisortatigut tiguneqartaput. Maannalu nannut amii qulit sinneqartut Namminersornerullutik Oqartussani tigummineqarput.

Atammiup eqqaani nannut toqunneqartut amii Nuummi ammerivimmut Kittanut tunniunneqarput.