Nannut aallaaneqartarunnaarnissaat borgmesterip sulissutiginiarpaa
Nannut nunami uumasunut aamma inunnut ulorianartorsiortitsisarmata aallaallugit toqunneqartarput. Nannumik tullianik takunittoqarpat aallaanagu allatut iliuuseqartoqassamaartoq, Icenews allappoq.
Nannut toqunneqartannginnissaanik suliniartuuvoq, inuk qaqutigoortumik pissusilik Reykjavikimilu borgmesteri, Jon Gnarr. Taassuma maanna suliniutigileruttorpaa interneti aqqutigalugu aningaasanik katersisoqarnissaa, siunertaralugu nannut aallaanagit uumasuusivissuarmi paarineqartarnissaat.
Reykjavikimi borgmesterip tamannarpiaq kommunemut qinersilernermi qineqqusaarutigaa, tassa qineqqusaarutigigamiuk soorunami uumasuusivissuaq nanoqartariaqartoq, tassalu maanna qineqqusaarutini piviusunngortikkaluttualeraa Icenews allappoq.
Aningaasanik internetikkut katersuiffigineqarsinnaasussaq, suli avammut tusarliunneqanngilaq, tamannalu saqqummiunneqarpat suliniut nunatsinniit aamma tapersersorneqarsinnaassaaq.