Nannunut sillimaniarneq annertusineqarpoq

Qanganisarsiooq Jens Fog arfininngormat nannumit saassutsippoq. Saassutsinneq sapaatip akunnera ataseq sioqqullugu, nanoq inersimasoq ilisimatusarfiup Zackenbergip kujataatungaaniittumut, qanillisimavoq. Nanorlu ilisimatusartunut qanillivallaaqiimmat, nanoq ersisaarlugu qimaatinneqarsimavoq.

Taamaammat Danmarkimi avatangiisinut misissueqqissaartarfiup, Zackenbergip eqqaa nanoqarpallaarnera pissutigalugu isumannaallisaaneq sukaterneqarpoq.

- Zackenberg tupinnaannartumik nanoqartorujussuuvoq, taamaammat pisoq ilungersunartutut isigaarput, taamaalillutalu inatsisivut sukateqqippavut. Ilisimatusarfimmi sulisut tamarmik misilittagartuujunngillat, inuusuttut atsaat suliartortut aamma ajunngitsumik isumannaatsumillu sulinissaat anguniartussaavarput, nannummi uumasuupput ulorianartorujussuit, Morten Rasch Zackenbergimi misissuisuni aqutsisuusoq Ritzauimut taama oqarpoq.

Isumannaallisaanerup sukuteriffigineqarnerannut, Svalbardimi misilittakkat malillugit ingerlanneqarpoq. Zackenbergimi aallaasit atortullu allat, inummut illersuutaasinnaasut pitsanngorsarneqarput, kiisalu Zackenbergimut tikittut tamarmik aallaammik atuisinnaannissaanut pikkorissarneqartassallutik.