Nannunut illersuutissamaatini eqqartuussaassutigaa

Angutip pigisimavai timmiarsiutit nutaanngitsut arfinillit, aallaat Mauser taavalu savik immikkut suliarisaq sanerarmioq. Taamaammat angutip taassuma ukiumi ataatsimi qaammatinilu pingasuni parnaarussaanissaa illoqarfimmi eqqartuussisut aalajangerpaat, Fyns Amts Aviisimi tamanna allaaserineqarpoq.

Angut eqqartuussivimmi nassuiaavoq, Kalaallit Nunaanni najugaqarallarami, piniariaraangami aallaat nassartarsimallugu, nannunut illersuutiginiarlugu. Angummi taanna 57-inik ukiulik ukiorpassuarni Kalaallit Nunaanni najugaqarsimavoq.

Unnerluussisussaatitaasut suliaq Qallunaat Nunaanni Landsret-imut suliassanngorteqqippaat, inatsit maanna atuuttoq nutaajuallaaqimmat.

Sakkut pillugit inatsit nutaaq atulinngikkallarmat sakkunik sakkortuunik pigisaqaraanni ukiuni sisamani parnaarussaasoqarsinnaasarpoq, maannali sivikinnerpaamik ukioq ataaseq parnaarussassanngortinneqartarput.

- Eqqartuussutit amerlasuut sakkukillisarneqartalernerat siunissami atorneqartalerniarunarmat maanna misileraapput, maannalu taama pisoqarunarpoq. Pisup suli naammassineqannginnera sullitama ajuusaarutigeqaa. Isumaqarpormi sakkortuvallaamik pillagaalluni, angutip eqqartuussissuserisua, Thomas Hess-Petersen, Fyns Amts Aviisimut oqarpoq.

57-inik ukiulik siusinnerusukkut pillagaasimanngilaq, aamma eqqissisimasuullunilu nipaarluusoq misissuinerni paasineqarpoq.