Nannunniartitsisarneq eqqunniarneqalerpoq

Nannut illersugaanerat piniagaanerallu pillugit nalunaarutissaq januaarip aallaqqaataani atuutilertussaq Namminersornerullutik Oqartussani atorfilittanit suliaralugu naammassineqaleruttorpoq.

Aalisarnermut piniarnermullu naalakkersuisoq Rasmus Frederiksen oqarpoq, nalunaarusiaq nannunik piniartitsilersinnaanermik imaqassasoq.

-Suliaq naalakkersuisuniittussaavoq augustip ingerlalaarnerani. Nannunut nalunaarusiaasussaavoq, tassanilu ilaatinneqarput nannunut piniartitsisarnerit, Rasmus Frederiksen oqarpoq.

Kalaallit piniartut nannunik ilimagisamit amerlanerujussuarnik Baffinip Kangerliumarngani pisaqartarsimasut kingullertigut paasineqarpoq. Kalaallit nannunik ukiumut 200-t angullugit pisaqartarput, ilimagisamit pingasoriaatingajammik amerlanerusunik. Tamannalu Nunavumi oqartussat paasillugu allanngortikkusuppaat, isumaqartoqarmat, nannut amerlavallaarujussuartut nunatsinnit pisarineqartartut.

Taamaattumik nunatsinni Nunavumilu atorfilittat augustimi ataatsimiittussanngorput, nannut amerlassusaasa ataatsimoortumik aqunneqartalernissaat siunertaralugu.

-Siullermik naatsorsuutigaara ataatsimiinneq siulleq ukiamut aallartittussaq aammalu ukioru ataatsimiinnerit arlallit ingerlanneqaqqaassasut, tassani siunertarineqarluni nannut qanoq amerlatigisut pisassiissutigineqarnissaat. Kisianni aatsaat naatsorsuutigaarput 2006-mi pisassiissutigineqartut qanoq amerlatigeqqissaarnissaat aalajangiunneqassasoq. Kisianni nannunniartarneq uani eqqartorneqassaaq Nunavullu Kalaallit Nunaallu aallaqqaataasumik augustimi ataatsimiinneranni.

-Ataatsimiinnissami siunertarivarput, aamma nalunaarutigereernikuuarput pisassiissuteqassagutta 200-t missaani, imaluunniit amerlanerulaartut piniartortatsinnut pisarineqarnissaat.

Malunnartumik Nunavut-miit oqariartuutigineqareerpoq pisassiissutit apparniarlugit sulilu appaaqqinnissamik eqqarsaateqartut.

Taanna oqariartuuteqarnerat soorunami uagut piniartortagut eqqarsaatigalugit pisarineqartartut ukiumut soorunami aallaavigalugit pisasseerusunnerput ataatsimiinnermi malunnartinniarparput, Rasmus Frederiksen oqarpoq.

Nunarput kisimi nannunik amerlavallaartunik pisaqarnerarlugu uparuarneqarneq ajorpoq, aamma Nunavumi nannut pisarineqartartut amerlineqarsimammata uparuarneqarput.