Nannunniartitsisalernissaq piaarpallaarsoraat
Nunatsinni pinngortitamut avatangiisinullu illersuiniaqatigiiffimmi Uppimmi siulittaasup Jens Peter Langep naalakkersuisut takornarianut nannunniartitsisalernissaat ernumanartoqartippaa.
Uppiup siulittaasua isumaqarpoq naalakkersuisooqatigiit takornarianut nannunniartitsisalernissat piaarpallaartoq.
- Isumaqarpunga naalakkersuisooqatigiit siullertut suliareqqaartariaqaraat nunap iluani inuiaqatigiinnut atuuttussanik inatsisit malittarisassallu, taakkua naammassereerunikkik pissusissamisuussaaq takornarianik nannunniartitsisarnissaq. Nunatsinnimi nannut qassiunersut, ukiumullu qassit piniaqqusaanersulluunnit naluarput. Taamaammat nunatsinni killeqanngitsumik suli piniartoqartillugu avataaneersunut ammassinerat takuneqarsinnaavoq, uumasut navianartorsiortinneqarnerat suli annertusarneqartoq, Jens Peter Lange nassuiaavoq.
- Nunatsinni uumasunik piujuaannartitsinissamik ingerlatsinissaq pillugu naalakkersuisooqatigiit atsioqatigiissunnikuungaluarput, aningaasameerneraasiit pissutaalluni nunatta uumasuinik illersuisoqannginnera erserpoq, tatineqaqqinnissarlu aajunaralaarsuaq, tamannalu ulorianarpallaarpoq, Jens Peter Lange nassuiaavoq. Ilanngullugu siunnersuutigaa nunatta iluani piniarnermut inatsisit malittarisassallu aaqqinneqarnissaasa tungaanut takornariat qimussiunneqarlutik nannunik uumasunik takornariartittarnissaat pitsaasuussangaluartoq.
Aalisarnermut piniarnermullu pisortaqarfiup neriuutigaa inatsisit malittarisassallu aasaru naammassineqarnissaat.