Nannunniartitsisalernissaq nangaanartoqartippaa
Pinngortitamut avatangiisinullu illersuiniaqatigiiffimmi Uppimmi siulittaasup Jens Peter Langep naalakkersuisut takornarianut nannunniartitsisalernissaat ernumanartoqartippaa.
Uppiup siulittaasua isumaqarpoq naalakkersuisooqatigiit nannunniarsinnaanermut tunngasunik nunatsinni inatsisinik malittarisassanillu suli aaqqiisoqanngitsoq piaarpallaartumik takornarianut nannunniartitsisalernissamik avammut suaaruteqartut.
- Uumasunut taakkununnga pineqartunut inatsisinik malittarisassanilu aaqqeeqqaartariaqaraluarpugut, Jens Peter Lange ernumanerminut tunngavilersuivoq.
Jens Peter Langep nunatsinni piniariaaseqarnerput pillugu avataaniit tatineqaqqinnissaq ernumassutigaa.
Nunarput siornatigut puisinniarnermi qilalugarniarnermilu piniariaaserineqartut pillugit sakkortuumik isornartorsiorneqartareerpoq.
- Ernumanartuutippara avataaneersut aallaavigalugit naalakkersuisut malittarisassiornissat, tamanna piniartunut ajoqutaasinnaammat. Aamma uumasut nungutaanissaminnut navianartorsiortinneqartutut taaneqarsinnaasut nannut pineqarput, naalakkersuisullu aningaasaq piinnarlugu maanna uumasut navianartorsiortut takornarianut neqeroorutigilerpaat, Jens Peter Lange oqarpoq.
