Nannunniartitsineq akerleralugu illersorlugulu

Aappaagumiit akiliisitsilluni nannunniartitsisalernissamik naalakkersuisut pilersaarutaat illersorlugu assortorlugulu oqallinnermi kalaaliuneq, qallunaajuneq, pinngortitamilluunniit illersuisuuneq apeqqutaatinnagu isummersortoqarpoq.

Uumasunik ilisimatooq qallunaaq borgmesterilu kalaaleq nannunniartitsisalernissamik illersuipput, illuatungaani uumasunik nungutaalersorisanik ilisimasalik qallunaaq atuakkiortorlu kalaaleq akerliusut. Oqallinnermi sumiuuneq pingaarnerujunnaarluni pineqartut, nanoq piniartorlu qitiutinneqarput.

Atuakkiortoq Karl Siegstad inuusuttuulluni Avanersuarmi piniartuusoq nannut takornarianut piniagassanngortinneqarnissaannut isumaqataanngilluinnarpoq. CITES-imi siunnersorti Birgit Sloth isumaqatigaa radioaviisimut ippassigami oqarmat taama piniartitsisoqartalissappat tamanna Kalaallit Nunaata isigineqarneranut ajoqutaassasoq. Karl Siegstad isumaqarpoq piniartut ikiorserneqaratik ajoquserneqaannassasut.

-Tusaamaneqarnermut taama ajortigisoq aatsaat iluamik ajorseriassaaq, uumasut nungutaalersututu isigineqartut taama piniarneqartalissappata, Karl Siegstad oqarpoq.

Akiliisitsilluni nannunniartitsisalernissaq saqqummeqqaarmat uumasunik ilisimatooq Thor Hjarsen isumassarsiamik iluarinnittunut ilaavoq, taamaattoqassappalli nannuttassat pinngitsooratik killilersorneqalernissaat pisariaqassanerarlugu. Tamatumunnga Qaanaap borgmesteria Naimanngitsoq Petersen IA-meersoq isumaqataavoq.

- Nannut takornarianit piniagaalissappata pisassat soorunami sukannersumik killilersorneqartariaqarput. Nannut ima amerlatigaat, aamma uagut eqqatsinni, allaat Nunavumi pisassat marloriaatinngortinneqarlutik, Naimanngitsoq Petersen oqarpoq..

Akiliisitsilluni nannunniartitsisarlernissaq piareersarlugu malittarisassat piniarnermut pisortaqarfimmi suliarineqarput, nannullu killilersorneqalernissaat tamatumani ilaavoq.

Siusinnerusukkut oqaluttuaraarput Brigitte Bardot dronningimut allagaqarsimasoq, naannunniartitsisalernissaq unitseqqullugu, kunngikkormiulli ullumi uppernarsarpaat, droninngi allakkanik taamaattunik tigusaqarsimanngitsoq.