Nannunniarneq killilersorneqartariaqanngilaq

juulip 19-at 2005 14:04

Savissivimmi piniartup nannunniartartutoqqallu 62-nik ukiullip Qaarngaaq Nielsenip nannut piniagaanerisa killilersornialersaarneqarnerat pisariaqarsorinngilaa.

Naalakkersuisut pilersaarput, nannut ukiumut 200-t missaat siunissami pisarineqartalissasut.

”Qilalukkat killilersorneqalermata piniartut aamma akerliupput, nannut aamma killilersorneqalerpata piniartut akerliunissaat ilimagaara”,

Qaarngaaq Nielsen oqarpoq

Nannunniarnermi killilersueriaatsimi periuseriniarneqarpoq, piniarnermik allagartallip takornariaq imaluunniit inuk nalunngisani piniarnermik allagartaqanngitsoq akiliisillugu nannutsissinnaagaa.

Taama akiliisitsisalernissami Nunavummiut siunnersuuteqarput, 160.000-t tikillugit akiliisitsisoqartassasoq. Tamanna Qaarngaaq Nielsenip isumaqatigaa.

”Ullutsinni atortorissaarutit pitsaaqaat, avammut tamakku aqqutigalugit nittarsaassisoqarsinnaavoq”, Qaarngaaq Nielsen oqarpoq.