Nannunik tammajuitsussarsiniarneq iluaqutaasinnaavoq

Pinngortitaq pillugu nunarsuaq tamakkerlugu suliniaqatigiiffik WWF sinnerlugu, nunatsinni pinngortitamik atuinitsinni pisussaaffivut pillugit nalunaarusiamik 1993 -94-imeersumik nalilersueqqittoq, biolog Thor Hjarsen isumaqarpoq, aningaasaatilissuit tammajuitsussaminnik nannunniartalernissaannik, Naalakkersuisut ammaassiniarnerat, aningaasaqarnikkut nannunullu iluaqutaasinnaasoq.

- Tammajuitsussarsiortitsilluni piniagassanillu angisuunik piniartitsisarneq, nunarsuatsinni assigiinngitsuni ingerlanneqartartut qiviassagutsigit

annertuumik akiliisitsilluni ingerlanneqakkajuttarput. Tassunga ilaallutik, piniarsinnaanermut akuersissutit aammalu inuppassuit tammajuitsussarsiortunut sullissisinneqartut eqqarsaatigalugit isertitsissutaasarput.

Nanoq ataaseq 200.000 koruunilerlugu piniarneqartalissappat imaassinnaavoq piffimmi nannup illersorneqarnera annertusarneqartoq.

Namminersornerullutik Oqartussat nannunik kisitsinissaat pisariaqarluinnarpoq, nannut pisassat amerlassusilernissaannut tamanna pingaaruteqarmat, biolog Thor Hjarsen oqarpoq.