Nannumik Islandimut kingumut pisoqarpoq

Nanoq alla Kalaallit Nunaanniit Islandip sineriaata avannarpasissuata nunataanut sapaatip-akunnerisa marluk matuma siorna pisimavoq. Taanna takuneqarsimatsiaannarluni Avatangiisit pillugit ministereqarfimmiit akuerineqarnikkut piniartunit aallaaneqarpoq, tamannalu Islandimi tusagassiorfinnit aalassassutaaqaaq.

Taamaammat nannup kingulliup Islandimut pisup qanoq pineqarnissaa tusagassiorfinnit islandimiunillu malinnaaffigineqaqqissaarpoq. Islandip sineriaata avannarpasissuata nunataanut ullup qeqqata siorna qaqivoq, timmissallu eqqissisimatitat manniinik ullup ingerlanerani nerillattaarluni.

Københavnimi Uumasuusivissuaq Islandimi oqartussaasunit attavigineqareerpoq, aviisilu Ekstra Bladet naapertorlugu, uumasuusivissuarmiit uumasut inaannik nassartitsillutik Islandiliartitsiniarput, nanoq ungoorlugu tassunga pisinneqarniassammat.

Reykjavikip kommuniani uumasut nakorsaat, Egill Thorri Steingrímsson, naapertorlugu, nerisai aqqutigalugit nannup ilisimajunnaartinneqarnissaa takorloorneqarpoq, uumasup inaanut taamaalilluini inissinneqarniassammat. Tamannali siusinnerusukkut misilinneqarsimanngisaannartoq uumasut nakorsaat nassuerpoq.

-Suli tamakkiisumik pilersaaruteqanngikkallarpugut, neriuutigaarali nanoq annaassinnaassallutigu, Egill Thorri Steingrímsson oqarpoq.