Nangaasumik pissusilersorneq pasitsatsitsisoq
Danskinit angallat tingerlaatilik pigineqartoq 35 fodimik angissusilik hashimik 118 kiilumik useqartoq sapaatip-akunnera kingulleq paasineqarpoq, sunaaffa ikiaroornartoq hashi ilaatigut aqqartartut iltilersuutaannut puiaasarsuarnut toqqorlugu ikineqarsimasoq.
Angallat tingerlaatitik pasinapiluttoqartoq sinerissamik alapernaarsuutip Ejnar Mikkelsenip juulip ulluisa qulingannili paasivaa, taamani nunap isuata eqqaani Nanortalimmi angalatillunili alapernaarsuutip takkunnera inuttaanit nuannarineqanngeqisoq malunnareersimammat.
- Ejnar Mikkelsenimi aqumiut angallat attaviginiarsaraat, paasiniarlugu imartami iluliarasaartumi angalanerminni ikiortariaqarnersut, nangaasunnguamilli akisimapput pisariaqartitsinatik, nalunarsimanngilarli iluliarasaartumi angalanermik sungiussisimanngitsut, Kangilinnguani Sakkutooqarfik nittartakkaminni taama allaaserinnippoq.
Angallatip attavigineqarsimanera pillugu sakkutooqarfik Nuummi politiinut nalunaaruteqarput. Piffissarlu sivisunngitsoq qaangiummat angallat taannarpiaq nalunaarpoq motorerliulerlutik. Alapernaarsuutip Ejnar Mikkelsenip politiillu suleqatigiillutik angallat illoqarfiliaappaat, politiillu misissuinerminni paasivaat hashimik kiilorpassuarnik oqimaassusilimmik useqartoq.
Angallatip inuttai marluk maanna ugguarsimassaqaat Ejnar Mikkelsenip aallaqqaammulli saaffiginnissutaa inussiarnersoq inussiarnersumik akisimannginnamikku.
Politiit nalilerpaat ikiaroornartoq hashi 118 kiilu Kalaallit Nunaanni aqqusinermi tunisaanermini ikinnerpaamik 60 millioni koruuninik isertitsissutaasimassagaluartoq.
