Naneruakkut Nuuk suiallagaat

Naneruakkut nipilersortillugit tusarnaariarpassuaqartuaannarpoq. Arfininngormalli unnukkut Nuup aqquserngi quatseruttortut anorersuarnissaa ilimasaarutigineqarmat pissutsit allaanerupput.

- Aarleqqutigisimagaluarparput tusarnaariat suli ikinnerussasut. Aamma tusarnaartitsinissaq qanillereeqimmat taamaatiinnarsinnaasimanngilarput, Naneruakkunneersoq Ulrik Augustussen KNR-imut oqarpoq.

Taamaakkaluartoq tassa tusarnaariat 400-ut sinneqarput nalunaaqutaq aqqanerniit ataatsip tungaanut tusarnaartitsisoqarmat. Tupinnanngitsumillu tusarnaartitsineq naammassimmat taxa-nik pissarsiniarneq ajornakusoorsimavoq aqquserngit quasannerujussuat pissutigalugu aqqusinerni angallanneq unipajaarmat.

Naneruakkut nuusiaminnit pingasuusunit tusaqqoornartuliatik appeqattaarpaat Naneruakkullu nuusiassaasa sisamassaat 2006-mili piareersarneqarsimagaluarpoq.

- Immiunnissaali kinguartinneqartuarsimavoq illoqarfeqatigiinnginnatta aamma feeriarfissat ilaquttavut ilagalugit atorusuttaratsigit, Ulrik Augustussen oqaluttuarpoq.

- Kisianni tassa erinaativut nutaat cd-i ataaseq sinnerlugu amerlassuseqalernikuugaluarput. Kisianni tassa eqqartornikuuarput erinnat nutaat saqqummereerpata aatsaat tusarnaartitsinerni atortalerumaarlugit, Ulrik Augustussen oqarpoq, ullulersinnaannginnerarpaalu qaqugu immiusseqqissanerlutik.