Namminersulernissaq ukiunik 50-inik kinguartilli

Danmarkimi Dansk Folkepartiip nunatta namminersulernissaata ukiunik 50-inik kinguartinneqartariaqarnera pillugu immikkut ilisimasalinnik tusarniaatitsinissamik siunnersuutaa Folketingimi ullumi oqaluuserineqassaaq. Dansk Folkepartii isumaqarpoq nunatsinni ilinniartitaanikkut killiffik ajornartorsiutaasullu aaqqeqqaarlugit namminersulertariaqartugut, tamannalu pissutigalugu namminersulernissarput ukiunik 50-inik kinguartinneqartariaqartoq.

Siunnersuuteqartut Folketingimi ilaasortat Dansk Folkepartiimeersut Søren Espersen Christian H. Hansen-ilu taama isummernertik pillugu aviisini arlaqartuni, AG-mi Dagblademi, Informationemilu oqaaseqartareernikuupput. Søren Espersen isumaqarpoq tusarniaasoqartuuppat, nunarput sinnerlugu Folketingimi ilaasortat Lars-Emil Johansen-ip kiisalu Kuupik Kleistip saamerliuniartuusut isummernerisa saniatigut allat isumaannik Folketingi tusassalluni periarfissaqalissasoq.

- Tusarniaasitsinissaq namminersulernissaq pillugu ataatsimiititaliarsuup sulinerminik naammassinnilerneranut naleqquppoq, siunnersuuteqartoq Søren Espersen taama tunngavilersorpoq.

Folketingimi ilaasortaq Inuit Ataqatigiinneersoq Kuupik Kleist Folketingip nunarput pillugu ataatsimiititaliaanni siulittaasuusoq isummernissamut suli utaqqimaarpoq, siunnersuutigineqartoq ataatsimiititaliami ullumi oqaluuserineqassammat.

Lars-Emil Johansen, Dansk Folkepartiit siunnersuutaannut isumaqataanngilaq. Søren Espersen nunasiaateqarpalaartutut eqqarsarnerarpaa.

- Esperseni imaluunniit qallunaat allat nunatta siunissaanut aalajangiisussaanngillat, Lars-Emil Johansen AG-mi taama issuarneqarpoq.

Dansk Folkepartiip siunnersuutaa tapersersorneqassappat tusarniaanissat aappaagu aallartinneqarsinnaanissaat siunertaavoq.