Kalaallit Nunaata namminersulernissaa tuaviuuttariaqanngilaq, taama Demokraatit tutsiupput Naalakkersuisut siulittaasuata namminersulernissap innuttaasunik taasissutigineqarnissaa pillugu ukiortaami oqalugiaammini ullulerlugu taammagu.
Innuttaasunik taasisitsinissaq ulloq tassaatinneqarpoq ukioq manna 2008-mi novembarip 25-iat.
- Soormitaavaana aalajangigassat pingaaruteqartut taama nukingertigisumik aalajangiunneqartalersut? Namminersulernissap aalajangiiffiginissaa ukioq ataaseq imaluunniit ukiut marluk qaangiuppata pissappat apeqqutaanngilaq – tamatumanili pingaarnerpaaq tassa Namminersulernissaq pillugu aalajangernissaq inuiaqatigiit ataatsimoorlutik, isumaqatigiillutik ataatsimoorlutillu aalajangiuppassuk, ilaatigut taama Demokraatit tusagassiutinut nalunaarumminni allapput. Taakku kajumissaarutigaat tamatuma ullulerneqarnissaa Inatsisartuni aalajangiivigineqassasoq imaanngitsoq Naalakkersuisut siulittaasuata isumassarseriasaarneratigut tamanna aalajangerneqassasoq.
- Soorlu naluneqanngereersoq Siulittaasup partiiata iluani partiimi siulittaasunngorniulluni pissaaneqarniunneq aallartereerpoq, taama demokraatit ilaatigut oqaasertaliipput.